本文重點
勒邦占士同韋迪喺今夏雙雙約滿，為怕兩大NBA球星離隊，佢哋所屬嘅城市各自發起挽留大行動！其中克里夫蘭就號召全城名人拍攝大合唱MV，務求以溫情感動勒邦占士留守騎士，至於邁阿密亦設立網站「We Want Wade」，畀大家留言游說韋迪繼續効力熱火！
熱火開網站留韋迪
騎士喺今季季後賽提早出局，無疑加深勒邦占士離隊機會，所以克里夫蘭方面亦急急出招留人，近日邀請唔少名人好似俄亥俄州州長史特蘭等拍攝MV，佢哋仲改寫米高積遜名曲《We are the world》，變成《We are LeBron》，將「We are the world，we are the children」改為「Please stay LeBron，we really need you」，一於向「大帝」盡訴真情！
至於邁阿密方面亦唔輸蝕，近期成立網站「We Want Wade」，除咗供球迷留言之外，仲教大家如果有幸喺街見到韋迪，就向佢大嗌「我哋需要韋迪」，總之就要令韋迪覺得備受重視，唔捨得離開熱火轉投他隊！