塞爾特人贏94:85

兩屆常規賽MVP勒邦占士，爭取冠軍指環嘅美夢又再幻滅，尋日對塞爾特人嘅生死戰，佢雖然攞到27分、19個籃板同10次助攻「三雙」成績，但面對加納特（22分、12籃板）同朗度（12助攻）嘅出色表現，騎士最後都輸85:94提早出局，勒邦占士賽後承認：「有朋友話我實現夢想之前必定經歷噩夢，我依家就身處噩夢之中。」

占士完場後急急腳返更衣室，隨即除咗件騎士波衫送畀服務員，美國傳媒認定今夏可以自由轉會嘅大帝，爭冠失敗後必定離隊，塞爾特人球星加納特賽後就以過來人身份推波助瀾：「占士抬起頭！我都經歷過失敗，你會有非常光明嘅未來，為完成夢想你必須有所放棄，忠誠有時會傷害你，我後悔自己冇更早明白（轉會）。」

雖然公牛、籃網、湖人等球會都想招攬大帝，不過紐約人始終係大熱之選，事關喺紐約呢個大城市將可完全發揮勒邦占士嘅商業價值，依家紐約周街都貼住「歡迎占士」嘅海報，荷里活導演史碧奇李今場亦「破天荒」轉捧塞爾特人：「作為紐約人死忠，我冇可能鍾意『綠軍』，但我知道只要騎士被淘汰出局，勒邦占士就會嚟紐約！」

俱樂部定期搞占士之夜

紐約人為勒邦占士轉球衣款色、起新球場，整個紐約依家掀起「大帝熱」，全城最大型嘅男士俱樂部SCORES NY日前宣布，若果占士加盟紐約人，佢可以終生免費享用佢哋嘅脫衣舞孃，等班囡囡為大帝跳膝上舞，同時會定期舉行「占士之夜」，要脫衣舞孃着住佢件波衫表演，到時占士真係名副其實嘅「大帝」！