本文重點
占士悲情告別騎士？今季尾就會約滿、一心諗住幫騎士攞總冠軍留低美好回憶嘅勒邦占士，睇怕好夢成空，皆因「大帝」尋日大失水準，喺可能係自己最後一次騎士主場賽事以88:120慘敗畀塞爾特人，總場數落後2:3，咁樣爛尾告終，實在傷透球迷嘅心。
勒邦占士尋日可謂打出近兩年最差一仗，全場14射僅3中得15分，結果令騎士錄得季後賽史上主場最大慘敗。賽後占士認為騎士面臨出局係佢一手造成：「如果你喺系列賽有3場比賽都搵唔到射波手感，總場數落後2:3肯定會發生。」
由於塞爾特人下場會返番主場比賽，而且一贏波就晉級，所以季尾就會約滿嘅占士，尋日好可能係最後一次代表騎士喺主場比賽，唔知係咪因為咁，占士喺完場前3分58秒被換出場時，同騎士一眾教練及奧尼爾擊掌，極有告別意味。
塞爾特人受讓抵玩
其實又難怪占士會提早投降嘅，皆因塞爾特人今屆踏入季後賽後脫胎換骨，好似尋日咁，「三巨頭」皮雅斯、加納特同雷阿倫合力轟入64分，加上朗度喺下半場狂取16分，表現實在無懈可擊。聽日「綠軍」返番主場對騎士，絕對有力再下一城提早晉級，受讓1.5分下盤捧得過！