MVP即係MVP，前日先話手肘傷勢加劇可能要提早收咧嘅占士（23號），尋日單節就打殘塞爾特人，並且貢獻38分、8個籃板同7次助攻嘅「準三雙」成績，率領騎士以124:95大炒「綠軍」，總場數領先2:1。

賽前盛傳占士收咧疑雲，嚇到一班騎士fans鼻哥窿冇肉，不過呢位新鮮出爐嘅常規賽MVP，就用實際行動證明自己有幾硬淨！「大帝」尋日一落場就撻着，第1節瘋狂跳投攻入21分，加上奧尼爾同占美臣分別貢獻12分、20分，成隊波嘅命中率高達59%，卒之騎士以29分之差大勝「綠軍」。

太陽拔刺領先3:0

塞爾特人全場捱打冇起色，部分Fans喺第4節更加憤而離場，今戰亦係「綠軍」球季賽史上最羞家主場敗仗，主P:力皮雅斯賽後冇晒癮：「喺主場球迷面前輸成咁真係羞家！」占士愈戰愈勇，聽朝Game4有力再下一城，作客讓1.5分上盤要得過。

同日，太陽憑「大茄」達基斯發威，喺第4節射入4個3分波攻入23分，作客以110:96反勝馬刺，總場數領先到3:0晉級在望。