08/05/2010

播放本新聞相關短片

杜域侯活獵鷹撞爆鼻

如果畀人打到爆鼻,應該痛到阿媽都唔認得,不過杜域侯活尋日流晒血仍取得「雙雙」,帶領魔術主場再炒鷹隊112:98,總場數領先至2:0,真係抵佢全票入選最佳一隊!

賽後勞氣:「我唔係鐵造!」

話說意外發生喺第3節,當時杜域侯活上籃,點知畀鷹隊嘅荷福特一手打落塊面度,結果「魔獸」個鼻啲血即時好似開水喉咁流,好彩休息2分鐘後冇事,最後仲取得29分同17個籃板,成為NBA近40年嚟,第4位喺季後賽有25分、17個籃板兼命中率有85%嘅球員,加上卡特、劉易斯同尼爾遜分別有24、20同20分,鷹隊唔輸真係有鬼。值得一提,魔術有4位球員得分達20分以上,係該隊喺季後賽史上第一次有咁嘅成績。

對於畀人打到爆鼻,侯活賽後好勞氣:「我係人嚟㗎!唔係用鐵造㗎!鷹隊班人對我好似殺狼一樣,搞到我流晒血又爆鼻。」但相信侯活過一陣就冇事,皆因佢啱啱同騎士嘅勒邦占士獲122位體育行家全部投「第一選票」,獲選入最佳陣容一隊,呢次亦係佢連續第3年入選,證明「魔獸」喺NBA真係無敵,聽日第3戰魔術作客鷹隊受讓2.5分,捧得過!

大衞李風