雖然只係第3年打季後賽，不過塞爾特人控衞朗度尋日面對新鮮出爐MVP勒邦占士毫無懼色，交出平球會季後賽紀錄嘅19次助攻，帶領「綠軍」作客以104:86大勝騎士，總場數追平1:1。
綠軍1:1追平騎士
塞爾特人尋日第3節以31:12拋離騎士，第4節初段更一度領先91:66，當中先得24歲嘅朗度，鋒芒完全蓋過勒邦占士，交出19次助攻追平「綠軍」名宿古斯喺季後賽嘅紀錄。
難得朗度賽後非常低調：「我相信隊友畀佢哋射波，一直嘗試令佢哋射波變得更易。」受到右手手肘傷勢困擾嘅占士今場大失水準只得24分，但佢賽後冇用受傷作輸波藉口，仲話好期待第3戰。第3戰將喺香港時間嚟緊周六，移師「綠軍」主場進行。
