02/05/2010

播放本新聞相關短片

加素0.5秒絕殺雷霆湖人晉級

【美聯社】作為NBA總冠軍衞冕隊伍,湖人最恐怖嘅地方就係個個都身懷絕技!呢支西岸「一哥」尋日畀雷霆打到氣咳,全靠加素喺完場前0.5秒絕殺得手,協助球隊作客以95:94擊敗雷霆,總場數贏4:2晉級,衞冕之路又行近一步!

王牌高比拜仁昨仗攻入全場最高嘅32分,不過風頭就畀隊友加素搶晒!話說湖人完場前仲落後緊1分,高比仔跳投「炒粉」,好在有加素補籃成功為湖人奠定勝局。「防守專家」阿堤斯亦相當抵讚,嘜到常規賽得分王杜蘭特冇啖好食,投射命中率僅得21.7%,係湖人能夠贏波嘅關鍵。

傳占士蟬聯常規賽MVP

同日,布沙發威貢獻22分同搶到20個籃板,率領爵士主場以112:104贏波,總比數4:2淘汰金塊,次圈將會硬撼湖人。考慮到爵士續有基利蘭高同奧古倦勤,4強Game1造訪湖人凶多吉少,湖人讓6.5分要上盤。

雖然NBA未發布官方消息,不過據內幕人士爆料,騎士球星勒邦占士會以大熱姿態蟬聯常規賽MVP,成為繼張伯倫、布特同米高佐敦等球星後,第10位衞冕MVP嘅球員。