本文重點
憑藉勒邦占士嘅「準三雙」，騎士尋日喺主場以96:94擊敗公牛，總場數以4:1淘汰對手出線次圈，不過「大帝」賽後證實右手手肘有傷，令下圈硬撼「綠軍」塞爾特人出現暗湧。
占士右手受傷現危機
「大帝」勒邦占士尋日再次發揮「全能王」本色，獨取19分、10個籃板同9次助攻，不過連續第2場戴上護臂嘅占士，喺比賽尾段明顯好唔妥，完場前有球罰球改用左手射更射到離行離列。賽後占士坦承唔知幾時整傷右手手肘，但的而且確影響到佢下半場嘅發揮，依家仲覺得好痛。
騎士出線後，次圈會硬撼尋日主場以96:86擊敗熱火、總場數同樣贏4:1晉級嘅塞爾特人，重演08年東岸4強翻版戰。賽前騎士主將占美臣就呼籲隊友唔好輕敵：「好多人話塞爾特人球員老，但佢哋一定有備而來。呢輪系列賽好難打，但應該好好玩！」
同日憑藉高比拜仁出色嘅指揮，協助加素同拜林分別射入25同21分，湖人打出漂亮一仗，主場以111:87大勝雷霆，總場數再次領先3:2，嚟緊只要贏多場，就可以殺入西岸4強。另外，小牛主場以103:81擊敗馬刺，總場數追成2:3，聽日小牛作客馬刺，為保晉級生機，呢場絕對唔衰得，受讓4.5分下盤值博。
鷹隊哥羅福膺最佳第6人
最後，鷹隊後備哥羅福尋日以大熱姿態，喺610分中取得580分，擊敗小牛嘅泰利（220分）同騎士嘅華拿祖（126分）當選最佳第6人，真係恭喜晒！
