NBA季後賽愈鬥愈激！本來諗住可以輕鬆出線嘅鷹隊，尋日勁黑仔，賽前先撞車繼而輸波，被公鹿追成2:2平手。至於魔術雖然連贏4場掃走山貓，成為首支晉級次圈球隊，不過杜域侯活就因為個犯太多同教練雲根迪發生衝突，埋下計時炸彈！
日前被公鹿追成1:2嘅鷹隊，賽前練完波返酒店途中，所搭隊巴居然畀架私家車撞，好彩隊巴所有球員同私家車入面兩母子都平安無事，不過由於隊巴損毀嚴重，球員迫於無奈要落車轉搭的士返酒店。
迪芬奴3分波致勝
唔知班球員係咪因為咁嚇親，鷹隊最後作客以104:111不敵公鹿，總場數被追成2:2。公鹿贏波功臣首推迪芬奴，皆因佢全場射入6個3分波獨取22分，「新人王」班頓真寧斯亦有23分。雖然鷹隊被追平，不過佢哋球員質素始終高過公鹿，只要唔再遭遇意外，相信聽日返番主場可以反彈，小讓5.5分追上盤！
「Foul on You」侯活同教練嘈交
至於魔術尋日作客以99:90輕取山貓，史上首次喺系列賽以4:0橫掃對手晉級，不過中鋒杜域侯活就因為個犯太多，只係上陣23分鐘得6分。其實杜域侯活喺呢個系列賽，4場波都受犯規困擾，每場平均上陣時間都唔夠30分鐘，最近兩場更6犯離場，難怪魔術球員近排幫侯活改咗個新花名，叫做「Foul on You」。
賽後魔術教練雲根迪承認佢同侯活鬧過交：「我覺得佢喺合理衝撞區就應該起跳，但佢竟然話自己就算做咩球證都會吹佢。」侯活亦口出怨言：「喺度打波太難啦！我覺得好多嘢都唔係我同球隊可以掌握到。」