本文重點
萊爾神奇康復化身雷霆救兵！呢位拓荒者球星做完膝部手術只係8日，尋日奇迹復出打救球隊，憑住兩球關鍵冷箭射贏太陽，最後協助拓荒者主場以96:87贏波，將總比數追成2:2平手。
拓荒者今季飽受傷病問題煎熬，萊爾喺常規賽尾段受重創，起初軍醫對佢嘅情況一啲都唔樂觀，仲有消息話呢位明星射手焗住提早收咧，偏偏萊爾就喺季後賽Game4神奇復出飾演救世主。
拓荒者總比數追平2:2
做完膝部手術只係8日嘅萊爾，連日嚟向傳媒吐苦水：「睇住隊波陷入困境，自己淨係坐喺場邊打氣但幫唔到手，感覺好痛苦！」賽前萊爾就狂Send短訊求教練麥美倫畀佢上陣，麥美倫驚呢位王牌咁急復出會再整傷，開波前通宵考慮佢嘅要求，最後做咗明智嘅決定！
萊爾今場唔算Sharp醒，後備落場只係10射4中，明顯未搵番手感，不過佢喺第4節射入關鍵3分波激發成Team人嘅鬥志，兼且喺尾段憑招牌式後退步投射得手，成為拓荒者贏波、場數追和2:2嘅大英雄。
今仗攻入全場最高31分嘅艾迪列治，就對隊友萊爾讚不絕口：「冇萊爾喺度，太陽場場都搵兩個人夾擊我，今場焦點落番喺萊爾度，我打得輕鬆好多！」萊爾復出唔止令拓荒者戰鬥力上升，仲激勵成隊波士氣，食住個勢聽朝造訪太陽受讓6.5分有望再下一城，捧下盤！