相比起首回合輸波，馬刺尋日表現大有改善，失誤由17次減至8次，第2節更利用「inside-out」戰術，喺高達68%命中率下取得34分。去到下半場鄧肯更着晒火，射入全場25分中嘅17分，兼搶到17個籃板，相反小牛主將魯域斯基就突然失準，頭7射炒6球，最慘喺第2節仲射失一個罰球，令連續入罰球次數停喺88球，未能超越邁克爾威廉姆斯嘅97球，只能排聯盟第2。

史葛布魯克斯膺最佳教練

馬刺尋日贏波另一個關鍵，係首戰只得4分嘅謝法臣知恥近乎勇，喺上半場射入全場19分嘅17分，賽後呢位前公鹿球星獲教練普波域治大讚勤力程度猶如一隻狗。

另外，今季帶領雷霆由上季嘅23勝激增至50勝嘅教練史葛布魯克斯，成功以480分，力壓公鹿教練史卡奧斯（313分）同拓荒者教練麥美倫（107分），成為雷霆及超音速史上首位當選最佳教練嘅主帥。最後預告埋聽日嘅賽事，總場數落後0:2嘅熱火會返番主場鬥塞爾特人，為保出線機會可以話不容有失，受讓4.5分下盤值博。