激將法唔係次次用得着，公牛班球員唔識死，竟然夠膽寸勒邦占士唔識射波，卒之自食其果死喺「大帝」手上！尋日勒邦占士瘋狂施展跳投絕技，轟入全場最高嘅40分，率領騎士喺主場以112:102擊敗公牛，總比數領先到2:0。
剷籃、入樽向來耍家嘅占士，喺系列賽首戰手風唔多順，公牛班球員尋日就猛喺後備席挑釁「大帝」，叫佢多啲跳投。唔襟激嘅占士爆發小宇宙，頻頻施展jump shot，全場23投16中貢獻40分、8個籃板加8次助攻嘅「準三雙」成績，乜嘢烏氣都吐晒！
賽後占士話：「我返屋企睇過第1場波嘅錄影帶，發覺公牛球員防守時縮得好後，我相信利用遠射可以搞掂佢哋，佢哋覺得我射波渣，我就偏要證明佢哋咁講係錯嘅！」騎士總場數領先到2:0，第3戰將會造訪芝加哥再決高下。
至於西岸嘅小牛聽朝就會繼續留守主場出擊，對住由跌晒Watt嘅鄧肯同柏加領軍嘅馬刺，要再下一城唔難，讓6.5分都要捧。