NBA季後賽喺周一凌晨將爆發第二輪激戰，剩餘8支雄師會壓軸登場。當中衞冕冠軍湖人「雙B」傷疲盡起，對住「初哥」雷霆，相信可憑經驗技壓對手打響頭炮，讓7.5分上盤值得支持！

雷霆新丁輸經驗

早前因拉傷左腳腳腱、缺席湖人常規賽最後13場賽事嘅拜林（Bynum），前日終於傷愈後首次恢復正常操練，表現仲唔錯添，佢話：「我依家感覺好好，一啲痛都冇。」對於拜林復出，教練積遜認為係及時雨：「拜林嘅身高對雷霆威脅好大，佢將喺呢個系列賽起到決定性作用。」事實拜林今季對雷霆好醒，平均每場射入19.3分，命中率更高達62.9%。

無獨有偶，高比拜仁（Bryant）亦喺日前復操，「小飛俠」早前飽受傷患困擾，唔止右手食指骨折，右腳膝頭哥亦腫晒，好彩經過教練積遜喺最後5場常規賽畀佢休息4場後，傷勢已有好轉，高比話：「雖然膝頭哥嘅傷唔會好，但我已經好番好多。」

湖人教練積遜早前因批評球證對待杜蘭特好似超級球星，成日優待佢博到foul，結果被聯盟重罰3.5萬美元，事後杜蘭特認為積遜對佢好唔尊重，但積遜就反擊話唔知杜蘭特嬲啲乜，睇怕今場佢肯定搵人好好招呼呢位球星，畢竟杜蘭特同雷霆（唔計前身超音速）今季先首次殺入季後賽，經驗麻麻面對傷疲盡起嘅湖人，要爆冷實在唔易。