今季東岸老8爭奪戰認真戲劇性！公牛尋日主場贏塞爾特人後，本來出線季後賽形勢大好，點知同時間竟然被人踢爆教練迪尼高之前曾經同副會長幾乎開拖，家陣仲要請律師處理添！
101:93贏塞爾特人
公牛尋日贏波全靠一對「後場孖寶」，當中戴歷羅斯取得職業新高嘅39分，至於軒域治就有30分，帶領公牛主場以101:93擊敗塞爾特人。
可惜喺呢個咁關鍵時刻，美國傳媒收到匿名人報料，大爆公牛教練迪尼高同副會長柏臣，喺上個月尾對太陽嗰場波，就諾亞上陣時間問題發生衝突。據講柏臣喺賽後怒氣沖沖衝入迪尼高嘅辦公室，一手捉住迪尼高嘅領呔，推咗佢心口兩下，之後仲撩迪尼高隻揪！迪尼高尋日承認確有其事，但就否認有講手。
