貴為01年MVP兼4屆聯盟得分王，艾佛遜就算34歲兼走緊下坡，都仲有大班Fans默默支持佢。AI今季由活塞過檔灰熊，簽約嗰陣口口聲聲話唔介意打後備，扶持美奧同基爾呢班後生仔上位，點知講一套做一套，卒之都係不滿出場時間少，打咗3場就拍吓蘿柚要求解約。
明星賽甩底傷盡粉絲
76人念舊，喺AI最霉嘅時候簽番佢，等「戰神」唔使退休咁陰功。AI雖然打唔番高峰時嘅水準，但一班「死硬派」Fans依然盲目投佢票，令偶像可以喺明星賽擔正。奈何江山易改，本性難移，艾佛遜又試頻頻請假，藉口話要照顧患病嘅囡囡，最後畀傳媒踢爆佢夜夜笙歌至真。
借囡囡過橋夜夜笙歌
AI當76人高層同球迷係傻仔，唔單止令無數支持佢嘅Fans一次又一次咁失望，仲要借埋囡囡過橋日蒲夜蒲，行為令人髮指。昔日「戰神」變成球壇「瘟神」，一代名將衰收尾搞到個朵臭晒，呢個最爛球星金獎AI實至名歸！