本文重點
鷹隊今季喺東岸展翅高飛，第6人哥羅福絕對居功至偉，佢繼上一場用招牌絕技「4分波」打贏速龍後，尋日朝早對巫師故技重施，全場射入28分帶領鷹隊作客以105:95再贏一場。今次係哥羅福職業生涯第28次射入「4分波」，將呢項NBA紀錄進一步延伸，難怪被捧為今季「最佳第6人」頂頭大熱！
「最佳第6人」大熱得主
射3分耍家嘅球員NBA大把，不過好似哥羅福經常可以入3分之餘仲博埋犯規就唔多。今場鷹隊同巫師打到第3節仲係83:83平手，哥羅福射入振奮士氣嘅3分，展開一段11:0嘅攻勢，第4節尾段佢更射入3分兼博到犯規，再一次以「4分波」絕招奠定勝局，哥羅福早前已打破名將米拿嘅「4分波」紀錄，堪稱係NBA史上最強「4分王」！
小牛嘅泰利、金塊嘅JR史密夫同太陽嘅菲爾都被視為今季「最佳第6人」嘅熱門人選，不過鷹隊中鋒荷福特就為隊友拉票：「哥羅福絕對會當選最佳第6人，呢一點係無可置疑，佢全季嘅出色表現應該獲得肯定。」鷹隊依家要保住東岸三哥位置，聽朝作客公鹿係關鍵比賽，以鷹隊依家出色狀態，受讓2.5分實在值得捧場。
