話咁快NBA常規賽已經進入尾聲，雖然西岸季後賽8強一早確定，但排位仍然七國咁亂，各隊目標當然係希望季後賽首圈避開湖人。其中聽日太陽鬥馬刺，以及雷霆對金塊，都足以影響成個形勢，掀起高潮。

目前西岸除咗湖人遙遙領先，其餘7隊相差勝仗都好接近，第2位嘅小牛，同金塊、爵士及太陽一樣係50勝27負，同第8嘅拓荒者亦只差3場勝仗，所以嚟緊每場勝負，都足以影響各隊入季後賽嘅排名。當中各隊最唔想一定係攞第8，皆因季後賽首圈將硬撼衞冕冠軍湖人，同自殺冇分別。

中鋒得分王正面交鋒

正因為咁，所以聽日太陽對馬刺，以及雷霆對金塊兩場大戰都好關鍵。當中太陽同馬刺近期都着晒火，雙方嘅中鋒史杜迪米亞同鄧肯亦有上佳演出。邊隊可以贏波？好大機會取決呢個「Match Up」！不過太陽有主場之利，上盤睇高一線。

至於雷霆對金塊，焦點就落喺雙方嘅得分王杜蘭特同安東尼身上，賽前金塊收到消息，左膝發炎已經缺陣1個月嘅簡安馬田傷勢有好轉，日內可以復操，可惜最快都要喺季後賽先可以復出，加埋教練卡爾因抗癌養病又繼續缺陣，雷霆上盤要捧！