本文重點
公爵大學第4度成為NCAA冠軍！尋日上演連NBA比賽都要讓路嘅NCAA決賽，公爵大學以61:59擊退神奇球隊畢拿大學，相隔9年再登上美國大學籃球界最高王座，主力辛格拿取得全場最高嘅19分，以及9個籃板，賽後更當選4強賽MOP（最傑出球員）。
傳籃網高薪挖角
今場戰情緊湊，上半場公爵只以33:32領先對手，下半場雙方繼續拉成均勢，完場前1秒，當時落後2分嘅畢拿有希獲特遠射3分失手，令該校今季嘅傳奇之旅正式落幕。
公爵教練「K教練」克爾澤維斯基今次第4次帶領球隊喺NCAA封王，並成為史上第3位曾取得4次或以上NCAA冠軍嘅教練，早前有傳籃網想用全NBA最高人工嘅1,200萬至1,500萬美元年薪，力邀呢位名帥出手打救球隊，不過佢就話冇意做救世主：「從未有人接觸過我，而且我對執教籃網毫無興趣。」