04/04/2010

播放本新聞相關短片

NBA第2個「2.3億球星」誕生

踏入30歲嘅球員冇前途?高比拜仁話你知31歲嘅佢依家「錢」途最燦爛!湖人尋日宣布同王牌球星高比拜仁續約3年,合約總值接近9,000萬美元(約7億港元)。「小飛俠」今次成功續約,更令佢成為「波神」米高佐敦外,NBA史上第2個3,000萬美元(約2.3億港元)年薪球星!

高比拜仁近年鋒芒漸漸畀勒邦占士蓋過,不過湖人對呢位超級巨星依然信心十足,尋日宣布以近9,000萬美元同佢續約3年,報道指高比仔未來3年人工分別為2,600萬美元、2,870萬美元同3,150萬美元,令佢超越麥基迪成為目前NBA年薪最高球員,事實喺NBA歷史上,就只有米高佐敦試過有3,000萬美元年薪嘅待遇。

3年合約總值近7億

當呢份合約完結後,高比拜仁已經35歲,佢亦承認今次可能係佢籃球生涯最後一份合約:「NBA好少球員會整個生涯只効力一支球隊,所以我對今次續約好興奮,我唔知呢份係咪我最後嘅合約,就算係都唔出奇。」

高比仔簽約後立即為湖人上陣迎戰爵士,結果佢全場取得25分同6個籃板,帶領球隊以106:92贏波,聽朝湖人又會喺主場對住馬刺,以湖人依家嘅高昂士氣,要贏冇咗柏加嘅馬刺唔難,讓5.5分照捧上盤。

爆裂米拿