尋日係復活節假期，入場觀眾都獲贈3隻朱古力復活蛋，其實今次比賽搞得咁成功，大會專誠請返嚟嘅「亞洲第一籃球DJ」謝明宏亦應記一功，佢會因應比賽情況揀選合適歌曲嚟播，將現場氣氛提升到頂點。例如尋日有球員5犯離場，佢就立即播出張學友嘅《吻別》，令現場球迷捧腹大笑。
每場波嘅半場時間，大會都會同現場觀眾玩射籃遊戲，經過第1日熱身之後，尋日個個都爭住落場玩，就連「三哥」苗僑偉都一時技癢加入戰團，不過唔知係咪緊張得滯，佢射幾球竟然全部炒晒，不過呢個遊戲旨在參與，入唔入都一樣有紀念品。大會見佢咁投入，仲搵埋佢做開球禮嘉賓添！
