本文重點
西岸老牌球隊馬刺，尋日用行動證明佢哋喺嚟緊季後賽仍然可以搞搞震，作客塞爾特人嘅馬刺憑真路比利驚人演出，令主隊出醜，錄得今季得分新低，搞到完場前5分鐘主場球迷更幾乎走晒人，認真羞家！
綠軍迷未完場幾乎走清
尋日馬刺贏波，可謂全靠真路比利！事關呢位代替受傷嘅柏加、連續第12次擔正嘅阿根廷球星繼續有好表現，取得28分同7次助攻，最後帶領馬刺作客94:73大勝塞爾特人，升上西岸第6。
可憐「綠軍」今場慘敗創出三大紀錄，分別係今季得分新低、今年主場最大敗仗以及自2月25號後，第3次輸超過20分或以上。由於塞爾特人尋日實在打得太曳，完場前7分鐘已經被球迷狂噓，過多2分鐘，主隊球迷基本上走得七七八八，搞到「綠軍」教練李華士都灰晒冇眼睇，提早返入更衣室。
最後預告埋聽日嘅賽事，直播戲碼有76人主場對雷霆。雖然雷霆近排明顯跌Watt，不過為咗爭取更高排名打季後賽，戰意肯定喺已經無緣季後賽嘅76人之上，讓7.5分上盤可以一試。