本文重點
尋日公牛主場對熱火，公牛球迷喺賽前狂向喺芝加哥出世嘅熱火主將韋迪拍掌歡迎，最後公牛以74:103大敗，希望「閃電俠」下季加盟可以話畫公仔畫出腸。
望韋迪「回歸」芝加哥
公牛暫時喺東岸排第9，本來尋日對爭季後賽競爭對手之一嘅熱火，應該打得特別落力先真。偏偏由於對方球星韋迪今季尾將恢復自由身，加上又喺芝加哥土生土長，所以一班公牛球迷，未開波前狂向韋迪拍掌歡呼，擺明想氹韋迪喺嚟緊暑假加盟！
之不過，大家咪以為韋迪獲得對方球迷倒戈支持就一定打得勁，查實「閃電俠」每次重返家鄉比賽都例牌手軟，尋日上陣29分鐘，就只得12分5個籃板同10次助攻，同應有水準有啲差距，不過仍然協助熱火半場領先對手30分奠定勝局。
賽後韋迪都話解釋唔到呢個問題：「賽前我攤喺床度，問自己點解次次喺芝加哥比賽都打唔出平時作客嘅水準。我諗我今日打得太急啦！」
雖然公牛尋日又輸咗近13場嘅第11場波，好在落後第8位嘅速龍只有2場半，仍有機爭季後賽，聽日主場對東岸包尾籃網，當然不容有失，讓9.5分上盤不妨一試！ 文：大衞李風