對單一對手主場最長連勝

一向守好過攻嘅馬刺，尋日主場對勇士突然「全民皆攻」，半場已經射入77分，最後憑真路比利同謝法臣各自射入23同21分、全場入波命中率高達64.6%下狂取147分，呢個分數亦係教練普波維治自96年執教馬刺後最高得分紀錄。其實馬刺一向對勇士好有計，連埋尋日，已經連續24次主場擊敗對手，係目前NBA球隊中，面對單一對手主場連勝最長紀錄。

值得一提嘅係，由於馬刺今場一早已經奠定勝局，好多主力都只係打咗一陣，鄧肯更只上陣14分鐘。不過教練普波維治咁做都無可厚非，事關馬刺嚟緊將會進入魔鬼賽程，接連面對鷹隊、雷霆、湖人、騎士同塞爾特人，聽日第一擊作客鷹隊，為咗打好根基保持士氣，當然唔衰得！

另邊廂，湖人尋日主場以104:96輕取木狼後，成為今季西岸第一隊出線季後賽嘅球隊，可惜中鋒拜林疑似碧咸式受傷，聽日主場對巫師極大機會缺陣，湖人讓14.5分略嫌太狠，宜博下盤！