本文重點
最近高比拜仁老竇申請教夏威夷大學，「小飛俠」出面拉票，大讚佢有料到，尋日仲負傷上陣，帶領湖人作客以102:96擊敗太陽，幫老竇壯聲威！
湖人終止作客連敗
高比拜仁你就聽到多，祖爾拜仁你又聽過未？原來高比老竇以前都打過8年NBA，綽號「Jellybean」，退休後先後教過WNBA同日本球會，依家就喺意大利教緊，不過最近聽到夏威夷大學炒咗教練就有意回流。對於老竇嘅決定，高比拜仁表示非常支持：「老竇嘅籃球理念真係好勁，如果夏威夷唔請佢，肯定係損失。」高比仲講笑咁話：「夏威夷請咗我老竇，一定會得到好多NIKE嘅嘢！」
高比尋日心情之所以咁靚，全因佢尋日場波終於唔使一個打晒，其餘4位正選全部得分達雙位數，助湖人終止作客4連敗，唯一可惜係高比喺第3節入樽時畀太陽嘅史杜迪米亞整傷手指，之後一直控唔到波，但佢賽後表示「OK」。輸波嘅太陽聽日喺主場對黃蜂，為爭取更高排名出席季後賽，可以話不容再失，讓6.5分上盤值博！
