本文重點
近況大勇嘅魔術，尋日憑杜域侯活取得「雙雙」，主場以113:87大破爆發內亂嘅快艇取得6連勝，聽日對住近況一樣唔掂嘅公牛，好大機會再下一城！
士氣低炒埋總經理
本身擔任快艇教練兼總經理嘅米克鄧利維，其實早喺1個月前已被撤銷教練一職，點知尋日再喺冇通知下，連總經理都冇得做。快艇近排士氣已經唔多好，尋日作客魔術，更有主將巴朗戴維斯因胃痛只擔任後備，結果畀魔術嘅杜域侯活喺內線為所欲為，勁攞22分同15個籃板。據講快艇係喺對魔術半場時炒米克鄧利維，但一眾球員喺賽後先從暫代教練甘曉士口中得知呢個消息。
賽後快艇中鋒卡文暗示球隊炒米克鄧利維，目的係騰出薪金空間，等季尾有本錢爭勒邦占士，為咗討好「大帝」，有傳更會畀佢揀快艇下一任教練同總經理。
講番魔術，聽日佢哋將會主場對公牛，公牛近排唔好得快艇幾多，尋日主場大敗畀爵士，經已累積5連敗，魔術只要贏多場就可以打破今季最長連勝紀錄，讓7.5分上盤捧得過！