喺上屆NBA總決賽不敵湖人嘅魔術，尋日再度交手異常火爆，頻頻出現衝突同鬧交場面，最終魔術成功復仇，主場贏96:94，令湖人喺「高比加素時代」首次錄得3連敗，賽後杜域侯活為咗反擊湖人鬧佢哋係小狗，仲喺更衣室扮狗吠，寸爆對手！

湖人3連敗

為報上屆總決賽一敗之辱，魔術尋日主場鬥湖人打得特別硬淨，其中班尼斯同高比拜仁喺比賽入面多次鬥批㬹，喺第3節胸頂胸後各攞一個技術犯規，已經夠激，點之班尼斯唔識死，之後竟然喺入樽後，有意無意將腳掛喺高比身上，雙方再發生對峙，魔術中鋒杜域侯活為幫隊友，更同高比鬥鬧，無端端又食技術犯規。

好彩杜域侯活成功將功補過，全場有15分同16個籃板，加上卡特亦有25分，最終令克服腸胃不適、攞到34分7個籃板7次助攻嘅高比拜仁都要輸波，同時令湖人自08年2月由灰熊簽入加素後，首次錄得3連敗。

最抵死係杜域侯活賽後喺更衣室扮狗吠，反擊湖人喺比賽中寸魔術係小狗，好在湖人聽朝會返番主場迎戰近況低迷嘅速龍，應該可以搵對手出氣，少讓7.5分上盤絕對玩得過！