活塞今季成績低迷，尋日作客唔止以92:99不敵騎士錄得6連敗，主將史杜基更喺比賽中突然暈低，要戴氧氣罩送院，好彩最後喺兩隊球員祈禱後成功甦醒，暫時留院觀察。

兩隊球員一齊祈禱

活塞尋日一度領先21分，不過隨住恐怖意外發生後，就兵敗如山倒。話說喺第3節剩番2分30秒時，雙方因暫停返入後備席休息，活塞主將史杜基坐低無耐就突然暈喺教練卡達嘅手臂上，完全失去知覺，嚇到當值醫護人員立即幫佢戴上氧氣罩，抬佢上救護車。

呢次意外足足令比賽暫停12分鐘，普林斯更坐喺張櫈度不發一言，結果最後被全場取得40分、13個籃板同6次助攻嘅占士帶領騎士反勝。賽後雙方球員圍圈為史杜基祈禱。據講史杜基喺送院途中已經恢復知覺，情況穩定，但就要留院觀察。其實史杜基早喺08年，已經試過因為頭暈而缺席比賽。睇怕活塞聽日主場對火箭都唔使預佢，仲要讓1.5分，都係捧下盤為妙！

放大圖片	放大圖片	放大圖片