冇高比、冇問題！雖然高比拜仁尋日主場對金塊嚴重失準，不過湖人喺呢場西岸大戰，仍然以95:89勝出，追到同騎士只差一場勝仗！

17射僅得3中

受制金塊嚴密防守，加上手風欠順，高比拜仁尋日完全發揮唔出水準，17射只得3中，全場只得14分，好彩其餘隊友交足功課，奧當喺第4節射入全場20分中嘅9分，兼有12個籃板，加素就有15分同14個籃板，最終帶領湖人成功收復第3節一度落後11分嘅失地，今季首次擊敗金塊。

今場係高比踏入2010年後，第3次喺一場波起手超過15球，命中率唔夠21.2%，但湖人喺呢3場賽事反而全部贏晒，證明冇高比一樣掂。賽後湖人已拋離西岸第二嘅金塊5場半勝仗，落後聯盟一哥騎士只有1場勝仗，聽日湖人主場對溜馬只要贏波，就有可能追平差距，既然目標就係前面，湖人讓12分，梗係照要上盤！