每年香港馬拉松都有跑手體力不支暈到，今年被捕捉到嘅畫面就更震撼，新聞台全日都播住一位擦傷面部嘅選手病情急轉直下經過，佢坐喺救傷站時已經神情呆滯，受訪時講咗一句：「死喇，我好似乜嘢都唔識咁嘅！」其後就開始全身抽搐，要即時急救，情況令人擔心。
馬拉松起源於一個古希臘故事，話說一名士兵從一個叫馬拉松嘅地方，跑到雅典傳捷報，結果完成任務之後就力竭而死，就知長跑並唔簡單，不過近年香港馬拉松卻變成嘉年華會，唔少平時連追巴士都氣喘嘅人，未經訓練都夠膽報跑，完全罔顧安全。
好可惜受傷畫面接二連三出現，日前阿仙奴中場艾朗藍斯遇上兇狠攔截，好彩當時有專業軍醫將骨折位置復位，否則最壞情況可能連腳都不保，筆者就見過一位朋友踢街場斷腳，結果未獲即時治療而被迫截肢。雖則話日日運動身體好，但畢竟業餘玩家嘅身體質素不及職業運動員，若果當正自己係運動明星，唔識量力而為，後果可以不堪設想。