見識過永倫地獄式訓練，終於明白為何該隊上季季中轉由南韓教練申東燦執教後，全部大牌球星均操到Fit晒，自信心更「返晒嚟」，奪得甲一男籃聯賽常規賽及季後賽總冠軍！每星期4次、每次3句鐘苦練，球星們都被這位「魔鬼教練」操到極限，面容扭曲的累透表情告知大家甚麼是「一分耕耘、一分收穫」！ 圖/文：Binlo子文、徐嘉怡
去年永倫大事擴軍，卻在銀牌賽敗予南華屈居亞軍，所以班主許業榮就動用「人情牌」，由南韓請來籃協技術委員申東燦幫手「執一執」，後者亦成功利用嚴格操練把一班早已上位的球星們操Fit，贏得聯賽「雙料冠軍」威到盡！不過，由於申東燦本身隸屬南韓籃協，球季一完就要趕返祖家，所以今季會否重返香江執教就引來不少揣測！
制訂地獄式訓練
上月初舉行的工商盃決賽，缺少了申教練帶領的飛飛（即永倫）就不敵南華，但原來申東燦已經「歸隊」，只是為免影響球隊部署，才於該場決賽作壁上觀；不過，眼見球隊再次「打回原形」在南華手下稱臣，申教練已經制訂了一系列地獄式訓練，務求再次谷起這班球星。
本報在上個星期獲得申教練「破例」批准採訪球隊閉門操練，見證這個「體能地獄」，只見當打的周迎堅、香振強、潘志豪等還勉強捱得住，但已年屆35的中鋒蔡芳裕就經已面容扭曲，到最後更筋疲力竭，只能在地上爬行。
人生得返工同籃球
雖然訓練內容是不斷重複地做「基本嘢」，甚至悶到抽筋，惟新加盟的葉嘉浩及蘇伊俊就表示好有用：「真係好辛苦，但比起一啲喺日頭要返工，夜晚要操波嘅隊友，自己就無乜理由捱唔到。不過，都幾開心嘅係雖然訓練相當嚴格，但隊友之間都係笑容滿面，氣氛亦好好全無怨言。因為我哋都相信，汗係唔會白流，一定可以換嚟進步同埋冠軍獎盃。」現時所有永倫球員都把自己所有公餘時間獻給訓練，他們都笑言：「呢幾個月我嘅人生就只有返工同埋籃球！」
申東燦小資料
國籍：南韓
年齡：53歲
威水史：
球員
82年亞運金牌
78年亞運銀牌（南韓）
教練
95年全國高中賽三冠王（景福高中）
09年甲一常規賽及季後賽冠軍（永倫）