本文重點
皮雅斯缺陣，加上塞爾特人陣營受流感侵襲，「綠軍」尋日喺主場以96:104輸畀魚腩籃網，爆出近年罕有嘅冷門！堂堂東岸勁旅搞成咁，都算羞家咯！
雙方近12次交手都係由塞爾特人贏波，加上籃網今季戰績衰到貼地，試問有邊個估到「綠軍」會輸吖？查實由第二節開始，籃網就一直帶到尾，夏里士、哥特尼李爾同布克盧比斯3位主將亦都大發神威，夾埋貢獻咗69分。
勝率相差逾5成
連續3場缺少星級射手皮雅斯嘅塞爾特人，今戰完全唔夠揪，雖則話隊波最近受到流感侵襲，搞到班球員狀態跌Watt，教練李華士就唔想為輸波搵藉口：「關咩流感事吖，根本就係佢哋打得差，輸波係咎由自取！」賽前籃網嘅贏波率唔夠1成，塞爾特人就超過6成，今次「綠軍」唔單止令球迷跌到一地眼鏡，仲帶挈籃網炮製近年5大冷門之一添！
