本文重點
火箭最強三叉戟誕生！講緊嘅係奇雲馬田、史高拉同布魯克斯，呢個攻擊鐵三角尋日齊齊轟入30+得分，唔單止創造球隊歷史，最重要係帶領火箭主場以109:104擊敗馬刺，終止3連敗頹勢。
齊齊射入30+創紀錄
早前由帝王轉會火箭嘅奇雲馬田，尋日終於喺加盟後第4場比賽重現射手本色，個人轟入33分，仲成功拉開對手防線，帶挈史高拉同布魯克斯分別有30同31分進帳，創造火箭史上首次喺一場比賽，同時有3位球員得分30+嘅佳話。
賽後史高拉大讚奇雲馬田係贏波關鍵：「奇雲馬田終於適應球隊，展現佢嘅能力，我哋好需要佢嘅得分。只要佢打得舒服，我相信我哋做咩都會好容易。」
其實馬刺尋日輸波，主因係主將柏加缺陣，聽日馬刺主場對太陽，呢名法國猛將依然上陣成疑，仲要讓太陽4分，似乎捧下盤會比較划算。