NBA史上最曳嘅處子戰正式誕生！被視為騎士爭標最後一塊拼圖嘅新兵占美臣，尋日朝首度為新球會披甲，竟然造出全場12投0中嘅「壯舉」，打破NBA紀錄（見表），騎士最終亦以93:110不敵山貓，錄得兩連敗！

山貓3挫騎士

占美臣由開賽一刻已經成為傳媒焦點，風頭更勝勒邦占士，點知落到場嘅演出就令騎士Fans大失所望，全場先後5次被封阻，12射全失，最終僅靠2個罰球攞得2分。賽後占美臣死撐咁話：「只係好普通嘅一晚，的確我未搵到節奏，但我可以同大家保證，絕對唔會再有下次！」就連占士都力撐呢位新隊友：「我哋唔會介意佢射失幾多球，只會繼續交波畀佢，我哋知佢一定做得到。」

未知係咪受占美臣嘅「壯舉」影響，今場占士只得22分同9個助攻，騎士季內第3次不敵山貓。好彩騎士聽朝嘅對手魔術，近況都唔算出色，尋日喺主場都可以85:95不敵小牛，兩支哀兵對決，騎士嘅「三巨頭」戰術都係時候見真章，受讓3分都幾抵玩。