NBA明星賽周末氣氛大跌！尋日舉行嘅入樽賽一樣悶到喊，結果紐約人嘅尼特羅賓遜憑住搞鬼表現成功搶分，紀錄性3度成為入樽王。
今屆入樽賽4位暗星交行貨，謝勒華萊士同沙朗布朗喺初賽只係玩反手入樽、背籃入樽等「例牌菜」，結果齊齊低分被Out。尼特羅賓遜同迪羅辛亦唔見得好突出，後者一次籃框邊反彈大風車入樽，就成為賽事唯一一次滿分動作。
不過尼特羅賓遜勝在識搞氣氛，入完樽走去搶走啦啦隊女郎嘅花球跳舞，令幾乎瞓着嘅球迷再次起哄。最終尼特羅賓遜以51%得票贏出，歷史性3度奪冠，佢領獎時話會將個獎獻畀住緊醫院嘅媽媽。
入樽賽一班新丁冇驚喜，相反一班老人家就喺各樣表演賽有好表現，塞爾特人老將皮雅斯就喺3分賽射贏史堤芬居里；太陽嘅拿殊以29.9秒喺技巧賽壓倒迪倫威廉士，繼05年後再奪技巧賽冠軍。杜蘭特就成功衞冕「HORSE」比賽冠軍。
重頭戲東、西岸明星賽，於香港時間今早9:00開波，且看由占士領軍的東岸明星隊可唔可以趁高比仔受傷打低西岸明星隊。（無綫明珠台、now670台及中央5台直播）