本文重點
正當NBA明星賽舉行期間，今季暫時最爆嘅球員交易亦都同時發生！小牛同巫師正式達成協議，雙方旗下合共7名球員將會嚟個大兜亂，其中以小牛前鋒祖殊侯活交換巫師嘅卡朗畢拿成為焦點。另外，騎士亦盛傳簽入太陽嘅史杜迪米亞，增強實力挑戰總冠軍！
今次7人交易裏面，巫師會放走前鋒卡朗畢拿、中鋒希活及後衞史堤芬遜，換入小牛前鋒祖殊侯活、古頓、辛高頓及昆頓羅斯。其實卡朗畢拿同希活本身係巫師主力，但仍然被放棄，會長格倫菲特都話迫於無奈：「我哋對今季成績好失望，打算透過交易帶嚟新衝擊。」
何況，巫師所得嘅四名球員當中，祖殊侯活、古頓同辛高頓都會喺今夏約滿，到時佢哋離隊會令巫師可以騰空薪酬空間，夏天可以重新簽入另一班球員再戰江湖！
史杜迪米亞或過騎士
至於小牛得到打過明星賽嘅卡朗畢拿後，奪標機會大增，難怪班主古班興奮到爆：「今次交易之後，小牛實力明顯增強！」
另一總冠軍大熱騎士，就有機會得到太陽中鋒史杜迪米亞，前提係佢哋要放走中鋒伊高斯卡斯、小將希臣及一個首輪選秀權。雖然條件辣咗啲，不過一旦成事，史杜迪米亞拍住勒邦占士，再加埋奧尼爾，同樣極具冠軍相！