泰拉基伊雲斯膺最佳

缺少咗首席球星戴歷羅斯嘅二年生隊，尋日就只得雷霆嘅韋斯布克個人獨得40分苦苦支撐，可惜面對新秀隊嘅頑強鬥志，明顯落入下風，就連2年生隊教練伊榮都狠批佢哋戰意不足。是役新秀隊最搶鏡自然係MVP球星、効力帝王嘅泰拉基伊雲斯，佢全場交出26分、6籃板同5助攻，不過賽後呢個13號仔就選擇將MVP大獎同隊友馬刺嘅貝理雅分享：「佢講得出做得到，真係搶晒所有籃板，係我哋嘅最大功臣。」貝理雅今仗攞22分同23個籃板。

至於喺新秀對抗賽半場期間進行嘅花式入樽外圍賽，速龍嘅新仔迪羅辛就擊敗咗快艇嘅艾歷哥頓，取得喺今朝嘅入樽賽參賽資格，有機會喺全球NBA迷面前一顯身手。