NBA明星賽自1951年首辦開始，唔計99年停辦一次，就只得2000年出現過一個非美國出生嘅MVP，嗰個就係來自美屬處女島嘅鄧肯。不過今屆魯域斯基絕對有望開創歷史，皆因佢撞正最佳時機，今屆賽事可謂史上最「嫩」明星賽，合共多達9名新人首次參賽，論資排輩，曾經9次參加明星賽嘅魯域斯基，今鋪坐正又有乜出奇？

魯域斯基或成歐洲第1人

先講地利，今屆賽事喺達拉斯舉行，要知道今次明星賽做各式各樣宣傳，魯域斯基全部都係主角，以佢喺呢度嘅人氣，點到今屆各大評判唔畀面先？至於人和，魯域斯基將會同老拍檔拿殊有更多合作時間。對於呢位36歲控衞，魯域斯基仲係讚不絕口：「佢真係寶刀未老㗎！走位、傳送、視野、打Pick & Roll仲係一流。」能夠重組當年小牛嘅黃金拍檔，要爭MVP自然無往而不利。

樣樣夾到正，都要魯域斯基有真本事先得，西岸主帥卡爾就對呢個小牛球星實力予以肯定，聲言揀佢頂替高比，根本毋須任何考慮。不過，呢位德國球星要做MVP，首先都要解決防守勒邦占士嘅難題，要知道「大帝」近5屆參賽就先後喺06同08年奪得MVP，個人實力毋庸置疑。

對於要Mark「大帝」，魯域斯基決定用輕鬆心情面對：「呢個Match up肯定唔易啃，不過能夠參與明星賽，感受呢份熱情，以及為達拉斯爭光，已經令我好興奮。」

其餘MVP熱門人選

韋迪（熱火）

國籍/年齡：美國/28歲

優勢：之前6次入選明星賽未嘗MVP，爭獎野心大。

奪MVP指數：★★★★

安東尼（金塊）

國籍/年齡：美國/25歲

優勢：高比拜仁缺陣，加上打法獨食，有利搶分。

奪MVP指數：★★★★

勒邦占士（騎士）

國籍：美國

年齡：25歲

優勢：曾奪06及08年明星賽MVP，今季狀態大勇。

奪MVP指數：★★★★★

魯域斯基（小牛）

國籍：德國

年齡：31歲

優勢：高比拜仁缺陣，有主場之利，人氣搭夠。

奪MVP指數：★★★★