13/02/2010

播放本新聞相關短片

高比AI唔玩 初二明星賽跌Watt

大件事!NBA東西岸明星賽香港時間年初二朝早9:30開打,點知尋日先嚟出事,原本東西岸明星隊正選、極受球迷歡迎嘅「小飛俠」高比拜仁同「AI」艾佛遜齊齊退隊,要立即補選小牛嘅傑特同紐約人嘅大衞李爾代替。

高比拜仁最近因扭傷足踝,已經連續缺席湖人之前3場比賽,至於「AI」艾佛遜更因為其中一個愛女最近患上重病,已經連續缺席76人之前5場比賽,兩人尋日齊齊通知聯盟退出比賽,不過高比表示會照去達拉斯睇明星賽周末入面嘅節目。

補選傑特李爾

由於以上兩人退隊,NBA總裁史端尋日立即補選兩位球員入伍,分別係小牛嘅傑特同紐約人嘅大衞李爾,當中「神奇叔叔」傑特連埋今次已經係第10次入選明星賽。至於大衞李爾則成為紐約人自01年嘅侯斯頓同史比威爾後,首位入選明星賽嘅球員。

不過大家要留意嘅係,以上兩位補選球員,唔會直接取代高比拜仁同艾佛遜喺明星賽嘅正選位置。西岸明星隊教練卡爾尋日已通知聯盟,會揀小牛嘅魯域斯基打正選;至於東岸教練雲根迪就未有定案,但預計將會係塞爾特人嘅朗度同鷹隊嘅祖莊遜中是但揀一個,取代艾佛遜嘅正選位。

00年起從未缺席

自00年起,高比仔同艾佛遜就從未缺席過明星賽,高比更曾奪得3屆明星賽MVP,而多次轉會都無復當年勇嘅艾佛遜亦奪得01及05兩屆明星賽MVP。繼基斯保羅同萊爾兩位新世代球星後,又有兩大「老一輩」球星缺席今屆All Star,對球迷同NBA嚟講,都係一大損失。