奧巴馬撐沙朗布朗

米高佐敦、卡達以至近年嘅杜域侯活，都留低過一幕幕令人印象難忘嘅入樽片段，可惜今屆賽事風光不再，5個參賽者之中，只得山貓嘅謝勒華萊士掹車邊可叫明星，就連兩屆冠軍尼特羅賓遜都話有傷，隨時可能退出衞冕！

冇星嘅明星入樽賽，惟有靠創意提升吸引力，速龍後衞迪羅辛雖然要贏出今晨對艾歷哥頓嘅外圍賽，先可以出戰初一嘅正賽，不過佢亦做足準備，據美國娛樂網站tmz消息，迪羅辛為向去世嘅米高積遜致敬，將會喺入樽動作加入MJ元素，例如將經典歌曲《Thriller》嘅喪屍舞步混入。

至於湖人後備沙朗布朗雖然名氣最弱，但就得到高比、占士同美國總統奧巴馬力撐！沙朗布朗早前隨湖人去白宮見奧巴馬，就得到總統當面鼓勵兼投信心一票，曾經喺另一項入樽比賽同沙朗布朗交過手嘅占士亦話：「我好鍾意佢，大家可以拭目以待。」據報隊友高比拜仁會助佢一臂之力，喺比賽期間充當助手角色，有咁強嘅後台撐住，呢屆史上最草根嘅入樽賽仍然夠晒睇頭！

其他參賽球手

迪羅辛（速龍）

簡介：未入NBA前曾兩度贏得入樽賽冠軍，入樽穩定性極佳，難度系數好高，入樽方法亦層出不窮。

謝勒華萊士（山貓）

簡介：02年入樽賽亞軍，有NBA版「櫻木花道」之稱，力量驚人，彈跳力唔錯，單雙腳起跳一樣咁出色。

尼特羅賓遜（紐約人）

簡介：06同09年入樽賽冠軍，今屆第4度參加，經驗豐富。每屆都必定搵人嚟做道具幫佢增加入樽嘅難度同趣味性。

艾歷哥頓（快艇）

簡介：身體質素出眾，控衞中彈跳力屬於頂級，喺大學有「Air Gordan」之稱，略嫌入樽動作難度唔大，冇乜創意。