近年NBA明星賽周末嘅技巧賽，成為「控衞王」嘅新指標，攞到冠軍嘅球員等同係NBA最佳控衞，難得今屆四代同堂，搵嚟拿殊、迪倫威廉士、戴歷羅斯同真寧斯4位嚟自唔同年代嘅控衞比併，肯定有一番惡鬥。
技巧賽由03年開始舉辦，歷嚟冠軍都係大家耳熟能詳嘅控衞，比賽要求參賽者用最快時間上籃、運球通過障礙、各種方式傳球，同喺五個唔同地點射3分，用最少時間球員為之勝出。今屆參賽者中，拿殊係第二屆冠軍，迪倫威廉士喺08年就用咗25.5秒完成賽事，創出歷屆最快紀錄，公牛嘅歷羅斯就係衞冕冠軍，最後真寧斯雖然今年首度參賽，但呢位今屆新人王大熱門，場均有17.5分同6.3次助攻，絕對有力挑戰3位師兄。