上年先首次創辦嘅HORSE，雖然被譽為係NBA明星賽周末中最柴娃娃嘅賽事，但就頗受球星歡迎，今屆賽事除有衞冕冠軍嘅杜蘭特，仲有塞爾特人嘅朗度同帝王新星卡斯柏參加。其實HORSE嘅玩法同香港流行嘅OUT差唔多，首先搵一位球員射波，之後一位參賽者就要跟足佢企位或方法射，做唔到就有一個英文字母，儲夠HORSE五個字就Out，直至得番一位參賽者就為之勝出。
至於3分賽方面，近年呢個獎項大多由「二打六」攞，好似熱火嘅曲克今屆就以衞冕身份參加，不過佢今年表現低沉，睇嚟好難冧莊，而且皮雅斯同比立斯都受傷患困擾，唔似會特別落力，所以外間睇好今屆賽事，不出13年嚟首位以中鋒參加3分賽嘅菲爾、加連拿利或者史堤芬居里其中一人攞到。