本文重點
原本以為打明星賽都成疑嘅「小甜瓜」安東尼，尋日竟然突然復出，結果唔止有好表現，仲帶領金塊主場以127:91壓死小牛！
突然好番可戰明星賽
安東尼之前因為扭傷左腳足踝連續缺席金塊8場比賽，好多人都以為佢要明星賽後先可以復出，不過「小甜瓜」尋日就突然喺主場對小牛一仗正選上陣，雖然最後一節冇落場，但全場上陣30分鐘，仍然攞到19分、4個籃板同6次助攻，帶領金塊創出球會史上贏小牛最大差距紀錄。對於復出，安東尼表示悲喜參半：「好嘅係我復出後首場比賽，唔使做太多嘢。但壞嘅係我已經兩個禮拜冇比賽，我想多啲比賽時間。」
隨住提早復出，亦意味住安東尼可以打明星賽，不過湖人球星高比拜仁機會就一半半，因佢同樣扭傷左腳足踝，教練積遜都唔想「小飛俠」帶傷上陣，可惜聯盟極之希望高比參加，因為關乎可唔可以吸引15萬觀眾入場睇波。聽日NBA將上演明星賽前最後兩場賽事，兩場戲碼都極之吸引，當中騎士尋日贏埋籃網創下12連勝，聽日喺東岸「一哥」大戰主場讓魔術4.5分，捧上盤應該冇衰！
