本文重點
「綠軍」塞爾特人遇強敵又腳軟！今季矢志重奪NBA冠軍嘅塞爾特人，尋日主場又以89:96不敵魔術，今季對頭8名球隊，累積只得3勝9負，睇嚟教練李華士係時候諗計，唔係今季爭標機會凍過水！
紐約人讓得起帝王
其實塞爾特人今季對強敵成日輸波嘅原因，就係經常喺領先優勢下發夢，好似尋日對魔術咁，半場領先51:40，點知去到第三節，居然畀魔術打出一段19:0嘅攻勢，當中魔術中鋒杜域侯活（左圖）同卡特都喺呢節發威各取9分，最後杜域侯活更攞到16分同13個籃板嘅「雙雙」。賽後塞爾特人教練李華士大爆球員喺更衣室內一直認為自己好過魔術，暗示班人自視過高。
同日帝王作客以104:115不敵速龍錄得6連敗，狀態曳到爆，聽日作客自「入樽王」尼特羅賓遜擔正後火力大增嘅紐約人，睇怕都係凶多吉少，紐約人少讓3.5分上盤玩得過！
