本文重點
一向以得分見稱嘅勒邦占士，近期轉玩助攻化身「無私大帝」，尋日更取得平職業最高嘅15次助攻，率領騎士主場以105:89大勝灰熊，連贏9場，聽日喺主場對住近況低沉嘅熱火讓10.5分，上盤值博！
熱火跌Watt難招架
由於隊中兩名控衞莫威廉士同韋斯先後受傷，勒邦占士近期特別專注幫隊友製造得分機會，好似尋日咁，全場攞到22分嘅「大帝」，就交出15次助攻，平咗自己職業生涯新高，近6場比賽第5次助攻達到10次或以上。賽後就連灰熊教練賀連斯都大讚占士：「占士喺場上睇到嘅嘢，其他球員根本睇唔到，我真係唔識用咩嘢字句嚟讚佢！」
聽日占士將帶領騎士喺主場對由老死韋迪揸旗嘅熱火。騎士近排弗到漏，對上4場比賽每場平均贏對手19分，相反熱火近5場就輸足4場，睇怕聽日都係聽炒。
