近排NBA唔知係咪冇拜神，幾位巨星居然連環受傷，繼「CP3」基斯保羅受創要做手術面臨提早收咧後，塞爾特人球星皮雅斯尋日亦勇戰受傷，兩人都有可能缺席嚟緊喺達拉斯舉行嘅明星賽。

皮雅斯「差錯腳」冇大礙

據黃蜂教練保華透露，基斯保羅接受磁力共振後，發現左膝嘅傷比初步診斷時嚴重，軟骨有撕裂情況，將要進行手術，保守估計最少要抖1至2個月，嚴重嘅可能提早收咧。基於「CP3」已正式肯定缺席明星賽，NBA主席史端將喺日內進行補選，當中金塊嘅比立斯同勇士嘅艾利斯都係大熱人選。

另外塞爾特人球星皮雅斯尋日作客巫師時，喺第一節唔小心踩中對方卡朗畢拿隻腳扭傷左腳，最後喺第四節更冇落場，好彩塞爾特人最後作客都贏99:88。賽後皮雅斯表示覺得自己嘅傷唔算太嚴重，應該冇事，望就咁望啦！

放大圖片	放大圖片	放大圖片