賽前落後湖人史上首席射手謝利韋斯28分嘅高比拜仁，尋日落場後如有神助，當第三節剩番4分14秒時成功入樽攞到第29分後，廣播正式宣布高比拜仁已打破謝利韋斯嘅得分紀錄。賽後高比接受訪問時表示：「能夠成為湖人史上得分王，對我嚟講絕對係一項重大嘅榮譽。」

高比續稱：「因為喺榜上全部都係偉大嘅球員。當我17歲嘅時候，謝利韋斯教識我很多嘢，佢向我展示點樣比賽、跳投、轉身。雖然我喺史冊上成功超越咗佢嘅紀錄，但呢個紀錄其實應該係屬於我哋、係「魔術」莊遜同其他偉大嘅球員一齊擁有。」

明鬥山貓翻身

可惜美中不足嘅係，湖人尋日最後卻輸波，主場嘅灰熊憑首度入選明星賽嘅蘭度夫攞到22分同17個籃板，加上另一名主力基爾獨取25分，最終協助灰熊主場以95:93爆冷擊敗湖人，終止4連勝紀錄。

聽日湖人將會返番主場對山貓，以湖人今季主場有23勝3負嘅佳績，只要高比繼續發揮水準，相信可以輕鬆重返勝門，讓11分上盤仍然值捧。