本文重點
米拿發火，非同小可！尋日拓荒者控衞安祖米拿突然着火，攻入個人職業生涯新高嘅52分，令球隊作客加時以114:112擊敗小牛。至於另一個米拿—巫師後衞米克米拿亦唔輸蝕，全場10次三分球起手命中7次，協助巫師主場以106:96射死紐約人！
安祖喪入52分生擒小牛
其實安祖米拿向來唔係以得分出名，今季平均每場亦僅有12.6分，但尋日對住小牛，全場31次起手入22球，創下其職業生涯新高嘅52分，佢賽後咁話：「我無刻意諗住破紀錄，只係做一個控衞應做嘅事，到有機會咪出手囉，之後就愈嚟愈順啦！」
米克7個三分波破紐約人
除咗呢個米拿之外，巫師嘅米克米拿亦有醒神演出，佢喺主場對紐約人除咗三分球10次起手入7球攻入25分外，同時亦貢獻9個籃板及8次助攻獲得準三雙成績，助主隊力挫紐約人。只係巫師聽朝主場對住嘅係塞爾特人，恐怕米克米拿再勁都難逃輸波命運，塞爾特人讓5分捧上盤！
