要數NBA喺關鍵時刻表現最穩定嘅球隊，相信非小牛莫屬！呢支西岸勁旅尋日成功抵禦公鹿最後一擊，主場以108:107險勝公鹿，追平NBA一項已經封塵咗50年嘅紀錄。

日前作客以50分大炒紐約人、創造球會史上最大勝仗嘅小牛，尋日返主場對公鹿，雖然有主將魯域斯基射入28分，可惜全場畀公鹿咬住唔放，未試過領先多過9分，當中公鹿中鋒波格特更取得職業新高嘅32分，好彩小牛中鋒丹比亞喺完場前成功箝制迪芬奴，令對方射失最後一擊，小牛先至贏波。

連贏10場「1分分差波」

雖然小牛最後險勝1分，但意義卻非常重大，原來小牛自07年後，已經連續10場喺分差只有1分情況下，都係贏波嘅一方，追平鷹隊喺1959年至60年創造嘅紀錄。對於達到呢個里程碑，小牛教練卡素爾好開心：「我知道呢個紀錄已經保持咗好多年。想有一個成功嘅球季，你一定要喺比數接近嘅情況下取得最後勝利，好好彩我哋成日做到。」

放大圖片	放大圖片	放大圖片

鳳凰城希爾受傷讓唔起

聽日小牛將會作客鳳凰城太陽，本來只係五五波，不過小牛喺緊張時刻心理質素明顯較好，再加上太陽今場有格蘭希爾因傷上陣成疑，小牛受讓5分，下盤幾抵玩o架！