本文重點
「綠軍」塞爾特人主場地板尋日因為太凍搞到濕立立，結果「跣」到快艇一班球員攤攤腰，命中率大跌，最終「綠軍」憑「4巨頭」合力轟入70分，主場以95:89撞沉快艇。
由於天氣寒冷，塞爾特人主場TD Garden嘅地板尋日極之濕滑，雙方喺第一節不停有球員出現跣低情況，入波命中率都喺37%以下。兩隊教練一度商議取消比賽，直至場館最後決定喺每隊進攻時，輪流派3位波童不停喺另外半場抹地板，雙方先繼續比賽，最終塞爾特人憑傷愈復出打第2場比賽嘅加納特射入17分，加上皮雅斯、雷阿倫同朗度分別有22、15同16分進帳，成功擊敗快艇取得兩連勝。
地板濕滑個個撻低
賽後快艇一眾球員對於喺濕滑嘅場地比賽都有微言，主將甘比更話佢哋用咗好多時間先可以克服呢個問題：「我哋好似個個都跣低過，然而當雷阿倫跣低嘅時候，『綠軍』先開始正視同去解決呢個問題，我哋都對呢件事好不滿。」
事實上，如果唔係場地滑，快艇尋日有力贏波，佢哋連卡文在內有6位球員得分達雙位數，狀態唔錯，聽日快艇作客11連敗嘅籃網讓10.5分，捧上盤。
