高比挽面子打沉紐約人

有加納特傷愈復出嘅塞爾特人，尋日造訪傷兵滿營嘅拓荒者毫無優勢，雙方要打到加時分勝負。身為三巨頭之一嘅雷阿倫打得勁差，成場波14投只得3中，偏偏佢就喺完場前42秒射入絕殺3分，協助「綠軍」以98:95險勝對手，難怪隊友皮雅斯都直豎拇指：「全隊冇人懷疑雷阿倫嘅射術，我哋對佢百分百信任！」

昨晨攞到25分加15個籃板嘅馬刺球星鄧肯（白衫），雖然成為咗NBA史上第35位個人得分達到兩萬分嘅球員，可惜馬刺最終仍喺主場以109:116不敵火箭，只能掃興而返。 （美聯社圖片）

前美國總統克林頓（左）喺紐約人對湖人場波呼籲大家為海地籌款，仲話包括湖人中鋒加素等10位NBA球星參與賑災計劃，每入1分就捐1,000美元賑災。 （美聯社圖片）

同樣咁有「卡士」嘅仲有高比拜仁，前日湖人輸畀騎士，高比仔畀占士搶晒鏡，佢老哥昨仗就喺第4節射入13分，並且攻入全隊最高嘅27分，協助湖人以115:105做低紐約人。湖人呢場有6位球員嘅得分達雙位數，班波咁Fit，聽朝對住近況飄忽嘅速龍冇甩拖，小讓4分捧得過。